今年平安夜少有人外出慶祝，由於本澳疫情掟咗個髮夾灣，感染數字心中有數地節節上升，很多人選擇留在家中渡過一個真正的「平安夜」，政府搞的共慶節目人流稀疏，毫不熱鬧，這也是預期。單看近日市面氣氛已經無哂癮，仲邊有心機去快活。也有可能染了疫生病在家休息，想去也去不了！因為羊群效應關係，一下子個個手足無措，加上買藥買唔到，睇病又睇唔到！原本普天同慶的日子，結果普遍的人都被政府辣㷫。
政府雖然強調已做好預案，疫情發展也計算之內，但恐怕計漏市民的反應。大起大落的環境，總是叫人難以一時適應，那怕實際情況不是所見到或理解到的嚴重，但只要有一兩個環節出問題，便會引起恐慌。不是政府一言兩語就能安撫。當初嚴厲封控，出街都要拉，製做出大家對疫情的第一次恐慌，擔心不擔都得匿埋。如今，中門大開，拿不是人人都啱用的抗疫包居家「自療」，並預告會有九成人中招，製造第二次的恐慌。
政府成日呼籲市民不要過份恐慌，實際是製造恐慌的始作俑者。政策往往少了考慮操作可行性，或者準確點說未有設身處地想清楚。系統或許未爆，但人的忍耐力早已到極限，無症狀，輕微病徵，盡量留家的留家，頂唔順或想求診的就申報經評估等發配，還有直接送院。即使政府不公佈疫情數字，看看身邊人逐一染疫都有數得計。舖頭無人手，急症室迫爆，還要降低標準叫陽性無病徵返工，如果都喺政府計算之內，卻又不預告天下，不是失策就是自以為是。
山草